FIQRET IBRAHIM FTERRA (SHEHU) (1916 – 1997) : Krijues, regjisor, gazetar e përkthyes.

Lindi në Fterrë. Studioi e punoi tërë jetën me përkushtim. Nxënës i gjimnazit “Zosimea”, studioi më pas në shkollën amerikane bujqësore, Kavajë. Shkoi, pastaj,për studime tregtare në Angli. Vazhdoi studimet në Universitetin e Bolonjës në Itali për apikulturë. Më 1939-42 kreu studimet për artin dramatik në Akademinë e Arteve të Bukura në Romë. U kthye në Tiranë e punoi në redaksinë e kulturës të Radio-Tiranës. I pasionuar pas teatrit, si regjisor, ngriti një trupë teatrale dhe vuri në skenë “Koprraci” të Molierit, me aktorin Mihal Popi, si dhe dramën “Vilhelm Teli” të Shilerit. Më 1944 shkoi në Itali, ndërsa 1947 në ShBA, ku për vite me radhë ka qenë përkthyes i rëndësishëm në median amerikane   nga shqipja në anglisht.

 Vdiq në Nju Xhersi në SHBA.

¶¶¶

AKT UNIKAL I NJË PATRIOTI SHQIPTAR

Fiqret Fterra (Shehu), emigruar në SHBA, para se të vdiste la amanet që hiri i trupit të tij të hidhej në det afër Fterrës. Me këtë akt unikal, ai tregoi edhe një herë se ishte dhe mbetet patriot i vërtetë.

Familjarët dhe fteriotët i bënë nderimet e duhura.

Në këtë ceremoni emocionale, në emër të bashkëfshatarëve tanë, foli Guro ZENELI:

Vëllezër e motra fteriotë, miq e dashamirës,

pjesëmarrës në këtë ceremoni emocionale !

            Për çdo njeri që ndërron jetë e meriton të thuhet rezymeja e jetës, por aq më tëpër për Fiqret Fterrën, si njeri i mirë e si patriot i veçantë, si artist e si intelektual, si njohës i mirë i shqipes, italishtes e gjermanishtes dhe, njëherazi, si përkthyes cilësor në gjuhën amerikane.

            Megjithëse nga fshati u largua që në moshën fëminore së bashku me prindët e tij, Ibrahim Shehun e Ilmo Dhulen, përsëri mbajti lidhje me Fterrën, dhe, kur u bë djalë i rritur, vinte tek halla e tij Aishe Shehja dhe gjyshja e tij në Dhulaj. Pasi mbaroi shkollën e mesme bujqësore amerikane në Kavajë, ku përvetësoi mirë anglishten dhe njohu Shekspirin, i lindi dëshira të merrej me artin dramatik. Në kondita të vështira ekonomike nisi veprimtarinë artistike, në fillim diletante e më vonë profesionale, mbasi mbaroi dhe studimet në Romë në Akademinë e Arteve për aktor e për regji. Ishin vitet kur Shqipëria ishte përfshirë në luftën për liri. U fut ca kohë si redaktor e si spiker në radjo - Tirana. U kualifikua për regji në Austri, ku artisti i njohur Hans Mozer i shpëtoi disa studentë shqiptarë nga dërgimi në frontin rus. Për artin Fiqreti punoi dhe me penën e tij të kulturuar. “ Atje ku ka teatër, ka qytetërim “ - shkruante Fiqreti. Mungesën e teatrit e quante mëkat. Në fillim të vitit 1944 u detyrua të largohej nga Shqipëria. Përmes vështirësish arriti në Kanada e më vonë në SHBA, në New Jork e New Jersey, ku jetoi derisa ndërroi jetë para dy vjetësh, në tetor 1997.

            Fiqreti, si me jetën e tij ashtu dhe me mbiemrin - Fterra, të cilin e mbajti gjithë jetën duke ua lënë edhe fëmijve, me amanetin që la “Hirin e trupit ma hidhni në “Detin Jon”, aty, sa më afër Fterrës”, vërtetoi tërësisht dashurinë e madhe që ka patur për Fterrën tonë, me njerëz të mirë, me ujë të pastër, me pemë të gjithëllojshme me natyrë ekzotike. Ndërsa, me veprimtarinë si intelektual, tregoi nivelin e tij letrar e kulturor dhe demonstroi ndjenja të larta progresive që në moshën e rinisë, në vitet ‘30-’40 e deri sa ndërroi jetë.

Momenti i sotëm, kur ne po plotësojmë amanetin e Fiqretit tonë, është në të njëjtën kohë jo vetëm vlerë e lartë e tij, por dhe nderim e respekt që i bën Fiqreti  Fterrës sonë, që na bën të gjithve në, është një çast historik për të gjithë fteriotët, është një shembëll i lartë i atdhetarisë së thellë shqiptare, që e bëjnë njerëzit e mëdhenj, siç është dhe Fiqreti.

            Gjej rastin të falënderoj në emër të të pranishmëve e të gjithë fteriotëve, bashkëshorten e denjë, atë që, siç thoshte Fiqreti, “e kam bërë fteriote”, Znj. KOSTANCA, amerikanen e nderuar, që na bëri këtë nder të veçantë për të marrë pjësë  në plotësimin e amanetit të Fiqretit të shtrenjtë, duke ia rritur vlerën Fterrës e duke pasuruar historinë e saj me këtë ngjarje, që është e para në llojin e vet. Dëshiroj të falënderoj, gjithashtu, Dritën e Dylonin,vajzë e djalë të çiftit model - Fiqret- Kostanca dhe motrën Liri me dy djemtë:Fatos e Agim Lubonja.

            Thenk Jou very much Mrs Kostanca and thenk Jou very much miss Drita e mister Dylon !

            Përpara se të hedhim hirin e trupit të Fiqret Fterrës në ujrat e kaltra të Detit Jon, ashtu siç deshi vetë Fiqreti, ftoj gjithë pjesëmarrësit që ta nderojmë Fiqretin tonë me një minutë heshtje…

            I përjetshëm kujtimi dhe shëmbulli i lartë i jetës së ti.

            Ju faleminderit

                                                                          Guro ZENELI

Marre nga gazeta "Fterra jone" Nr.- 16 tetor, 1999