BESIM TAHSIN ELEZI ( 20 mars 1935 ): Profesor, Doktor i Shkencave Mjekësore, kirurg i shquar.

                Ka  lindur në Fterrë. Ka kryer shkollën fillore në fshatin e lindjes dhe atë unike në Gjirokastër. Shkollën e mesme mjekësore e ka mbaruar në Tiranë në vitin 1952. Në vitin 1957 ka mbaruar me diplomë "shkëlqyeshëm" Fakultetin e Mjekësisë në Tiranë. Që atë vit është emëruar mjek kirurg dhe pedagog në Katedrën e Kirurgjisë. Më pas ka kryer specializime dhe kualifikime në disa klinika të botës.

               Me punë këmbëngulëse ka ngjitur shkallët e karrierës mjekësore, pedagogjike e shkencore. Në vitin 1964 mbrojti disertacionin për gradën shkencore "Kandidat i shkencave mjekësore”, më pas mbrojti disertacionin për gradën shkencore “Doktor i shkencave mjekësore”. Për veprimtarinë pedagogjike mori gradën "Docent" e më pas "Profesor". Në vitin 1976 u emërua shef klinike dhe në vitin 1982 shef katedre, që më pas u quajt Departament në Qendrën Spitalore Universitare "Nënë Tereza".

              Ka dhënë një kontribut të shquar në modernizimin e kirurgjisë shqiptare, duke futur shumë metoda të reja diagnostikimi dhe trajtimi. Ka përgatitur, në të njëjtën kohë, një numër të madh mjekësh dhe kirurgësh.

Në vitin 2003 u pensionua. Tani drejton Shërbimin Universitar të Kirurgjisë në Spitalin e Durrësit.

            Është zgjedhur Kryetar i Shoqatës së Kirurgëve të Shqipërisë, anëtar i Komitetit Permanent të Eurokirurgjisë dhe anëtar i Kolegjit Ndërkombëtar të Kirurgëve. Ka bërë një numër publikimesh dhe referimesh në takime shkencore në vend dhe jashtë. Ka botuar monografi e tekste mësimore dhe rreth 100 artikuj e kumtesa.

Është nderuar me urdhra e medalje të ndryshme. Në vitin 2002 është shpallur "Personalitet i shquar i Qarkut"  për Vlorën, ku në motivacion, midis të tjerash, thuhet: “…Vlerësohet si bir i Kurveleshit për atdhetari, humanizëm e marrëdhënie të ngushta shoqërore".

FTERRA, VENDLINDJA IME - COPËZA MË E DASHUR E ATDHEUT

Intervistë me Prof. Dr. BESIM ELEZI

YLL  I  KIRURGJISË SHQIPTARE

            Pyetje : Fterra ju njeh më shumë si birin e Tahsinit dhe si mjek në zë. A mund të na njihni shkurt me jetën tuaj familjare ?

            B.Elezi : Jam i gëzuar që komunikoj me bashkëfshatarët e mi në faqet e kësaj gazete. Qoftë jetëgjatë kjo nismë e bukur për një fshat që e meriton.

            Unë jam larguar nga Fterra në moshën 12 vjeç. Pas përfundimit të studimeve të larta punoj e banoj në Tiranë për më shumë se 40 vjet; me gruan Marikën, mjeke gjinekologe dhe djalin Bledar, inxhinier elektronik. - Vajza, Ema, punon si mjeke e përgjithshme në Austri. Jam i lumtur që jam dy herë gjysh i Jonit dhe Teas.

            Pyetje: Ç’kujtime ju sjell fshati i lindjes dhe ç’ju lidh me të ?

            B.Elezi: Fterra është vendlindja ime, është copëza më e dashur e atdheut.Me të lidhen kujtime të pashlyeshme të fëmijërisë dhe nostalgjia që vjen duke u shtuar me kalimin e moshës.

            Atje prehen eshtrat e babait tim të mënçur, atdhetar e demokrat, që e donte aq shumë Fterrën sa gjurmonte në historinë e saj zakone e doke homerike.

            Fëmijëria e traumatizuar nga luftrat e shkatërrimet, varfëria deri në uri ka patur dhe momentet e saj të gëzuara, ëndërrimet dhe shpresat.

            Në jetën time profesionale kam mjekuar me mijëra bashkëatdhetarë nga brenda dhe jashtë vendit, por kur marr vesh se vjen një i sëmurë nga fshati im, dhjetra llampa kujtimesh ndizen në mendjen time dhe në mënyrë spontane një simpati dhe interes i veçantë jo vetëm human e profesional, por dhe me ngjyrime të forta emocionale.

            Pyetje: Nga opinioni i kualifikuar jeni cilësuar si shkencëtar në kirurgji, si yll i saj. Cili është aktiviteti juaj shkencor?

            B.Elezi: Që në fëmini kam ëndërruar të bëhem mjek, ndofta i nxitur nga ajo nevojë e dhimbshme e fshatit për ndihmë mjekësore.

            Për të realizuar këtë më është dashur të mobilizoj gjithë energjitë e mia mendore e fizike, aq sa shpesh kanë mbetur të mangëta anë të tjera të jetës. Si shef i Departamentit të kirurgjisë të spitalit Universitar dhe Kryetar i Shoqatës së Kirurgëve, anëtar i Komitetit Permanent të Eurokirurgjisë dhe Kolegjit Ndërkombëtar të Kirurgëve, intensiteti i detyrimeve është shtuar.

            Përveç veprimtarisë praktike e pedagogjike të pasqyruar në shumë publikime e tekste, kam bërë dhe kërkime modeste të përmbledhura në dy monografi, të referuara në shumë aktivitete kombëtare dhe ndërkombëtare.

            Pyetje: Çfarë këshillash do t’iu rekomandonit lexuesve tanë?

            B.Elezi: Bashkëfshatarëve të mi dashamirës do t’iu uroj shëndet e dashuri për punën, solidaritet, shpirtgjerësi e vizion të gjerë botëkuptimor e kulturor.

                                                                                                            Intervistoi G.ZENELI

Nr.3 – shtator, 1997